എം.ടി: മലയാളിയുടെ ദൃശ്യബോധത്തെ പരിഷ്കരിച്ച മഹാവിസ്മയം

മലയാള സാഹിത്യത്തെയും സിനിമയെയും അന്തർദേശീയ തലത്തിലേക്ക് ഉയർത്തിയ എം.ടി. വാസുദേവൻ നായർ, മലയാളിയുടെ ദൃശ്യബോധത്തെയും ഭാവുകത്വത്തെയും അടിമുടി പരിഷ്കരിച്ച സർഗ്ഗപ്രതിഭയാണെന്ന് പ്രശസ്ത കവിയും സാംസ്കാരിക പ്രവർത്തകനുമായ ആലങ്കോട് ലീലാകൃഷ്ണൻ പറഞ്ഞു. കാണി ഫിലിം സൊസൈറ്റിയുടെ ആഭിമുഖ്യത്തിൽ സംഘടിപ്പിച്ച ‘എം.ടി: കാലത്തിന്റെ കയ്യൊപ്പ്’ എന്ന അനുസ്മരണ യോഗത്തിൽ മുഖ്യപ്രഭാഷണം നടത്തുകയായിരുന്നു അദ്ദേഹം.

“മലയാളിക്ക് അതുവരെ പരിചയമില്ലാത്ത ഒരു ദൃശ്യഭാഷയാണ് എം.ടി. പകർന്നു നൽകിയത്. വായനക്കാരന്റെ ഉള്ളിൽ ഒരു സിനിമ കാണുന്ന അനുഭവം സൃഷ്ടിക്കാൻ അദ്ദേഹത്തിന്റെ വരികൾക്ക് സാധിച്ചു. സാഹിത്യവും സിനിമയും തമ്മിലുള്ള അതിർവരമ്പുകൾ മായ്ച്ചുകളഞ്ഞ പ്രതിഭയാണ് എം.ടി. വാസുദേവൻ നായർ,” അദ്ദേഹം പറഞ്ഞു.

ഭാരതപ്പുഴയുടെ തീരത്തെ ജീവിതങ്ങളെയും അവിടുത്തെ സാംസ്കാരിക പൈതൃകത്തെയും എം.ടി. തന്റെ രചനകളിൽ അനശ്വരമാക്കി. നിളയുടെ ഒഴുക്ക് പോലെ ശാന്തവും എന്നാൽ ആഴമേറിയതുമാണ് അദ്ദേഹത്തിന്റെ ജീവിത ദർശനങ്ങൾ. വള്ളുവനാടൻ ഗ്രാമജീവിതത്തെ എം.ടി. അടയാളപ്പെടുത്തിയത് കേവലം പ്രാദേശിക കഥകളായല്ല മറിച്ച് മനുഷ്യന്റെ സാർവ്വലൗകികമായ അതിജീവനത്തിന്റെ കഥയായാണെന്ന് ആലങ്കോട് ലീലാകൃഷ്ണൻ കൂട്ടിചേർത്തു.