കേരളത്തിൽ നടക്കാൻ പോകുന്ന നിയമസഭാ തിരഞ്ഞെടുപ്പു സംബന്ധിച്ച് സി. പി. ഐ. [എം] സംസ്ഥാന കമ്മിറ്റി പുറത്തിറക്കിയ പ്രസ്താവനയുടെ സംക്ഷിപ്ത ഭാഗങ്ങൾ.

• കോൺഗ്രസ്സിനെ എതിർക്കാനെന്ന പേരിൽ ബി. ജെ. പി, മുസ്ലീംലീഗ്, കേരളാകോൺഗ്രസ്സ് മുതലായ വർഗ്ഗീയ പാർട്ടികളുമായി സഹകരിക്കാനോ ഈ പാർട്ടികൾ പ്രതിനിധാനം ചെയ്യുന്ന വിഘടന പ്രസ്ഥാനങ്ങളെ എതിർക്കാനെന്ന പേരിൽ കോൺഗ്രസ്സുമായി കൂട്ടുകൂടാനോ സാധ്യമല്ല.

• ഏതെങ്കിലും ഒരു ജാതിയെയോ മതവിഭാഗത്തെയോ പ്രതിനിധാനം ചെയ്യുന്ന പാർട്ടികളൊന്നും ഇടതുജനാധിപത്യ മുന്നണിയിലില്ല. അവയെക്കൂടി ഉൾക്കൊള്ളിക്കണമെന്ന് ആവശ്യപ്പെട്ട എം. വി. രാഘവനെപ്പോലുള്ളവർ കമ്മ്യൂണിസ്റ്റ് (മാർക്സിസ്റ്റ്) പാർട്ടിയിലോ മുന്നണിയിലോ ഇന്നില്ല.

• വലതു മുന്നണി ഭരണത്തിന്റെ കഴിഞ്ഞ അഞ്ചുകൊല്ലത്തെ നയസമീപനങ്ങളൊക്കെ തിരുത്തിക്കുറിക്കും.

• കാർഷിക വ്യവസായ മേഖലകളിൽ പുരോഗതി സൃഷ്ടിച്ചു തൊഴിൽ സാധ്യത വർദ്ധിപ്പിക്കും.

• എഫ്. സി. ഐ. ഗോഡൗണുകളിൽ കെട്ടിക്കിടക്കുന്ന 360 ലക്ഷം ടൺ ഭക്ഷ്യധാന്യങ്ങളിൽ ഒരു പങ്ക് തൊഴിലില്ലാത്തവർക്ക് തൊഴിൽ നൽകാനുള്ള മൂലധനമായി പ്രയോജനപ്പെടുത്തും.

• തൊഴിലില്ലാത്തവരുടെ അദ്ധ്വാനത്തെ ചെറുകിട ജലസേചന പദ്ധതികൾ, മണ്ണൊലിപ്പ് തടയൽ, പൊതുജനാരോഗ്യ പദ്ധതികൾ, ഗൃഹനിർമ്മാണം, കടലാക്രമണ നിരോധന നടപടികൾ, നിരക്ഷരതാ നിർമ്മാർജ്ജനം തുടങ്ങിയ കാര്യങ്ങൾക്കു പ്രയോജനപ്പെടുത്തി കേരളത്തിന്റെ പൊതുപുരോഗതിക്കു പശ്ചാത്തലമൊരുക്കും.

• കൃഷിക്കാർക്ക് വളം, മേൽത്തരം വിത്തുകൾ, ജലസേചനം, വൈദ്യുതി തുടങ്ങിയവ കഴിയുന്നത്ര സൗജന്യമായി നൽകുകയും, ഇടത്തരക്കാരുടെ ചൂഷണത്തിൽ നിന്ന് കൃഷിക്കാരെ രക്ഷിക്കുന്നതിനായി റഗുലേറ്റഡ് മാർക്കറ്റിംഗ് സമ്പ്രദായം ഏർപ്പെടുത്തുകയും ചെയ്യും.

• ജലസേചന പദ്ധതികളെ സമഗ്രമായി വിലയിരുത്തി ജലസേചന വികസനത്തിനായി ഒരു മാസ്റ്റർപ്ലാൻ തയ്യാറാക്കും.

• ദീർഘകാലമായി ഭൂമി കൈവശം വച്ചു വരുന്ന ചെറുകിട-ഇടത്തര, മലയോര കർഷകർക്ക് പട്ടയം നൽകും.

• കർഷകത്തൊഴിലാളികളുടെ പെൻഷൻ വ്യവസ്ഥ പരിഷ്ക്കരിച്ചു പുനഃസ്ഥാപിക്കും.

• സ്വകാര്യ മേഖലയിൽ വ്യവസായങ്ങൾ ആരംഭിക്കുന്നതിന് നടപടികളെടുക്കുകയും, പൊതുമേഖലാ സ്ഥാപനങ്ങളുടെ ദൗർബല്യങ്ങൾക്കു പരിഹാരം കാണുകയും, മാനേജ്മെന്റിൽ 50 ശതമാനം തൊഴിലാളി പ്രാതിനിധ്യം ഉറപ്പുവരുത്തുകയും ചെയ്യും.

• പരമ്പരാഗത വ്യവസായങ്ങളായ ബീഡി, കശുവണ്ടി, കൈത്തറി, കയർ, പനമ്പ് നെയ്ത്ത്, ചൂരൽ നെയ്ത്ത്, കരകൗശലം, ചെത്ത്, മത്സ്യം, ഓട് തുടങ്ങിയവ പുനഃസംഘടിപ്പിച്ചു വികസിപ്പിക്കും.

• വിദ്യാഭ്യാസ രംഗത്തെ കച്ചവടവൽക്കരിക്കുന്ന ഇന്നത്തെ അവസ്ഥ അവസാനിപ്പിക്കാൻ, സർക്കാർ ഉടമസ്ഥതയിലോ തദ്ദേശ സ്വയംഭരണ ഉടമസ്ഥതയിലോ മാത്രമേ വിദ്യാലയങ്ങളും കലാലയങ്ങളും അനുവദിക്കുകയുള്ളൂ.

• സർവ്വകലാശാലയുടെ സ്വയംഭരണാവകാശം പുനഃസ്ഥാപിക്കുക.

• പാവപ്പെട്ട വിദ്യാർത്ഥികൾക്കു സൗജന്യമായി ഉച്ചഭക്ഷണം നൽകും.

• എല്ലാ നിത്യോപയോഗ സാധനങ്ങളുടെയും വിതരണം പൊതുവിതരണ ശൃംഖലയിലൂടെ നടത്തും.

• സഹകരണരംഗം പുനഃസംഘടിപ്പിച്ചു ജനാധിപത്യവൽക്കരിക്കും.

• ട്രേഡ് യൂണിയൻ അവകാശങ്ങൾ സംരക്ഷിക്കുകയും, സംഘടനാ സ്വാതന്ത്ര്യത്തിനെതിരായ ഡെസ്‌നോൺ സമ്പ്രദായം അവസാനിപ്പിക്കുകയും ചെയ്യും.

• എല്ലാ സർക്കാർ-അർദ്ധസർക്കാർ സ്ഥാപനങ്ങളിലെ നിയമനങ്ങളും പി. എസ്. സി വഴി മാത്രം നടത്തുകയും, സ്ഥലമാറ്റത്തിന് ജീവനക്കാരുമായി ചർച്ച ചെയ്തു നിയതമായ ചട്ടങ്ങൾ ഉണ്ടാക്കുകയും ചെയ്യും.

• കഴിഞ്ഞകാലത്തു ഉന്നയിക്കപ്പെട്ട അഴിമതികൾ അന്വേഷിക്കുകയും, കുറ്റവാളികളെ മാതൃകാപരമായി ശിക്ഷിക്കാൻ തക്കവിധം അഴിമതി നിരോധന നിയമത്തിൽ ഭേദഗതി വരുത്തുകയും ചെയ്യും.

• തദ്ദേശ സ്വയംഭരണ സ്ഥാപനങ്ങളുടെ ഭരണം തിരഞ്ഞെടുപ്പിലൂടെ ജനങ്ങളെ ഏല്പിക്കും.

• സാമൂഹ്യവിരുദ്ധ ശക്തികളെ അമർച്ച ചെയ്യുക, ബഹുജനങ്ങളുടെ സമാധാനപരവും സ്വതന്ത്രവുമായ ജീവിതത്തിന് ഉറപ്പുവരുത്തുക, ജനകീയ പ്രക്ഷോഭങ്ങൾക്കും സമരങ്ങൾക്കുമെതിരെ പോലീസിനെ ഉപയോഗിക്കാതിരിക്കുക, ഹരിജനങ്ങൾ, സ്ത്രീകൾ, കുട്ടികൾ തുടങ്ങിയ ദുർബലവിഭാഗത്തിന് പ്രത്യേക സംരക്ഷണം നൽകുക തുടങ്ങിയ തത്വങ്ങളെ അടിസ്ഥാനമാക്കി പോലീസ് ഡിപ്പാർട്ട്മെന്റ് പുനഃസംവിധാനം ചെയ്യും.

• വൃദ്ധർ, വിധവകൾ, വികലാംഗർ, രോഗികൾ പെൻഷൻകാർ, പട്ടികജാതി, പട്ടികവർഗ്ഗക്കാർ, എക്സ് സർവ്വീസുകാർ തുടങ്ങിയവർക്കുള്ള ആനുകൂല്യം കാലോചിതമായി പരിഷ്കരിക്കുകയും, തൊഴിലില്ലാത്തവർക്കു നൽകിവരുന്ന തൊഴിലില്ലായ്മ പദ്ധതി പരിഷ്കരിച്ചു പുനഃസ്ഥാപിക്കുകയും ചെയ്യും.

• സംസ്ഥാന ജീവനക്കാരുടെ ശമ്പളം പരിഷ്കരിക്കുകയും സർവ്വീസ് ചട്ടങ്ങൾ ജനാധിപത്യവൽക്കരിക്കുകയും ചെയ്യും.

• സാംസ്കാരിക സ്പോർട്സ് മേഖലകൾ പുനഃസംഘടിപ്പിക്കും.

• പട്ടികജാതി-വർഗ്ഗക്കാർക്കുള്ള ആനുകൂല്യം തുടരുകയും, പിന്നോക്ക സമുദായത്തിൽപ്പെട്ടവർക്കുള്ള സംവരണ ആനുകൂല്യങ്ങൾ നിലനിർത്തുകയും ചെയ്യും.

• പിന്നോക്ക-മുന്നോക്ക വ്യത്യാസമില്ലാതെ സാമ്പത്തികമായി പിന്നോക്കം നിൽക്കുന്ന വിദ്യാർത്ഥികൾക്കു കൂടുതൽ വിദ്യാഭ്യാസ സൗജന്യങ്ങൾ നൽകും.

  1987 ഫെബ്രുവരി 15 കേരളശബ്ദത്തിൽ പ്രസിദ്ധീകരിച്ചത്.
  ©Keralasabdam/1987